သရက်မြို့နယ်တွင်၊ စခန်းကြီးရေနံမှော်တွင် ရေနံတွင်းတူးဖော်စဉ် မီးလောင်မှုဖြစ်ပွား

၂၀၁၆ ခုနှစ်၊ ဇန်နဝါရီလ ၁၁ ရက်

မကွေးတိုင်းဒေသကြီး၊ သရက်ခရိုင်၊ သရက်မြို့နယ်၊ သရက်မြို့မရဲစခန်းမှ ရဲတပ်ဖွဲ့ဝင်များသည် ဇန်န၀ါရီလ ၁၀ ရက်နေ့ ညနေ (၆)နာရီ (၅)မိနစ်အချိန်ခန့် သရက်မြို့နယ်၊ စခန်းကြီးကျေးရွာအနီး၊ သရက်-မင်းတုန်း ကားလမ်းမြောက်ဘက် စခန်းကြီးရေနံမှော်တွင် မီးလောင်မှုဖြစ်ပွားကြောင်း သတင်းအရ သက်သေများနှင့်အတူ သွားရောက်စစ်ဆေးခဲ့ကြောင်း သိရသည်။ 

စစ်ဆေးချက်အရ ညနေ (၅)နာရီ (၁၅)မိနစ်အချိန်ခန့်က စခန်းကြီးကျေးရွာနေသူ ဦးပိုက်ထွေး (၅၆)နှစ်၏ ယာခင်းမြေတွင် မန္တလေးတိုင်းဒေသကြီး၊ မဟာအောင်မြေမြို့နယ်၊ မင်းကုန်းရပ်နေသူ သန်းဖေ (၆၂) နှစ် မှ ဦးစီးလျှက် ရေနံတူးဖော် နေစဉ် ရေနံတူးပိုက်နှင့် သံခပ်ခွက်တို့ ပွတ်တိုက်မိပြီး မီးစတင် လောင်ကျွမ်းခဲ့ရာ မြို့နယ် မီးသတ်ဦးစီးမှူး အပါအ၀င် မီးသတ်တပ်ဖွဲ့ဝင် (၁၅)ဦး၊ ရွာသူ/သား (၂၀)ဦးခန့်တို့မှ မီးသတ်ယာဉ် (၂)စီးဖြင့် ၀ိုင်းဝန်း မီးငြိမ်းသတ်ခဲ့၍ (၅)နာရီ (၄၅)မိနစ် အချိန် မီးလုံးဝငြိမ်းသွားခဲ့ပြီး မီးလောင်မှုကြောင့် တရုတ်နီ အင်ဂျင်စက် (၂)လုံး၊ စက်ကလပ်ခုံ (၂)ခုံ၊ ပေပါခွံ(၆)လုံး၊ ရေနံစိမ်း (၅၀)ဂါလံပါ ပေပါ (၁)လုံး၊ သက္ကယ်မိုး၊ ထရံကာ၊ ၀ါးကြမ်းခင်း တစ်ဘက်ရပ် မြေစိုက်တဲ(၁)လုံး (စုစုပေါင်းတန်ဘိုး ၄၄၁၀၀၀ိ/-)တို့ မီးလောင်ဆုံးရှုံး ခဲ့ကြောင်း စစ်ဆေးတွေ့ရှိ ရသဖြင့် ရေနံတွင်းအား ပေါ့ဆစွာတူးဖော်၍ မီးလောင်ကျွမ်းစေ သူ သန်းဖေ အား သရက်မြို့နယ်၊ မြို့မရဲစခန်း (ပ) ၁၄/၂၀၁၆၊ ပြစ်မှုဆိုင်ရာ ဥပဒေပုဒ်မ ၂၈၅ အရ လည်းကောင်း၊ 

စွမ်းအင်ဝန်ကြီး ဌာန၏ ခွင့်ပြုချက်မရှိဘဲ ရေနံတူးဖော် လုပ်ကိုင်သူ သန်းဖေနှင့် ယာခင်း ပိုင်ရှင် ပိုက်ထွေး တို့နှစ်ဦးစလုံးအား သရက်မြို့နယ်၊ သရက်မြို့မရဲစခန်း (ပ)၁၅/၂၀၁၆၊ နိုင်ငံတော်ပိုင် စီးပွားရေး လုပ်ငန်းများ ဥပဒေပုဒ်မ ၉ အရ လည်းကောင်း အမှုရေးဖွင့် ဆောင်ရွက်လျှက်ရှိကြောင်း သတင်း ရရှိပါသည်။