မကွေးမြို့တွင် ယာဉ်စည်းကမ်း၊ လမ်းစည်းကမ်းဆိုင်ရာ အသိပညာနှီးနှောဖလှယ်ပွဲပြုလုပ်

မကွေး    နိုဝင်ဘာ  ၂၈

          မကွေးတိုင်းဒေသကြီးအစိုးရအဖွဲ့၏ ဦးဆောင်လမ်းညွှန်မှုဖြင့် မကွေးတိုင်းဒေသကြီး ယာဉ်စည်းကမ်း ထိန်းသိမ်းရေးကြီးကြပ်မှုကော်မတီနှင့် Htet Media &  Entertainment Co.,Ltd တို့ ပူးပေါင်းပြုလုပ်သည့် ယာဉ်စည်းကမ်း၊ လမ်းစည်းကမ်းဆိုင်ရာ အသိပညာနှီးနှောဖလှယ်ပွဲကို ယနေ့နံနက်(၈း၃၀)အချိန်က မကွေးမြို့ မြို့တော်ခန်းမတွင်ပြုလုပ်သည်။ အခမ်းအနားမုဒ်ဦးအား မကွေးတိုင်းဒေသကြီးအစိုးရအဖွဲ့ လုံခြုံရေးနှင့်နယ်စပ်ရေးရာဝန်ကြီးဌာန ၀န်ကြီး ဗိုလ်မှူးကြီးဇော်လင်းအောင်၊ မကွေးတိုင်းဒေသကြီး ရဲတပ်ဖွဲ့မှူး၊ Htet Media &  Entertainment Co.,Ltd မှ ဒေါ်သိင်္ဂီဇော်တို့က ဖဲကြိုးဖြတ်ဖွင့်လှစ်ပေးပါသည်။

          အခမ်းအနားတွင် မကွေးတိုင်းဒေသကြီးယာဉ်စည်းကမ်းထိန်းသိမ်းရေးကြီးကြပ်မှုကော်မတီ ဥက္ကဌ လုံခြုံရေးနှင့်နယ်စပ်ရေးရာဝန်ကြီးဌာန ၀န်ကြီး ဗိုလ်မှူးကြီးဇော်လင်းအောင်က ယာဉ်စည်းကမ်း၊ လမ်းစည်းကမ်း ဆိုင်ရာ အသိပညာနှီးနှောဖလှယ်ပွဲနှင့်ပတ်သက်၍ ရှင်းလင်းပြောကြားပါသည်။ ယာဉ်စည်းကမ်းလမ်းစည်းကမ်း များနှင့်ပတ်သက်သည့် အသိပညာပေး DVD အခွေများနှင့် တေးသရုပ်ဖော်အစီအစဉ်များအား Htet Media Group မှ နိုင်ငံကျော်အနုပညာရှင်များနှင့် တင်ဆက်ပါသည်။

          ယင်းနောက် မကွေးတိုင်းဒေသကြီးယာဉ်စည်းကမ်းထိန်းသိမ်းရေးကြီးကြပ်မှုကော်မတီ ဥက္ကဌ လုံခြုံရေးနှင့် နယ်စပ်ရေးရာဝန်ကြီးဌာန ၀န်ကြီးနှင့် Htet Media Group မှတာဝန်ရှိသူများက အမှတ်တရ ဓါတ်ပုံရိုက်ကူးခဲ့ပါသည်။

          ဆက်လက်၍ လူတိုင်းသိထားသည့် ယာဉ်စည်းကမ်းစည်းကမ်းဆိုင်ရာများအကြောင်းအား  ပညာရှင် တစ်ဦးက စတင်ဆွေးနွေးပြီး တက်ရောက်လာသူများက ပြန်လည်ဆွေးနွေးခြင်းများပြုလုပ်သည်။ ယင်းနောက် ဖျော်ဖြေရေးအစီစဉ်များဖြင့်တင်ဆက်ပြီး ယာဉ်စည်းကမ်းလမ်းစည်းကမ်းများအကြောင်း အများပြည်သူများ၏ အမြင်သဘောထားများအား ``ခြစ်ပေးပါ``စာစောင်များဖြင့် စစ်တမ်းကောက်ယူခြင်းများဆောင်ရွက်ပါသည်။  ဖျော်ဖြေရေးအစီအစဉ်များအား နိုင်ငံကျော်အဆိုတော်များကဆောင်ရွက်ပြီး ပြန်လည်ဆွေးနွေးခြင်းအစီအစဉ် များ ပါဆောင်ရွက်ခဲ့ကြောင်းသိရသည်။

          တက္ကသိုလ်ပေါင်းစုံနယ်မြေဖြစ်သည့် မကွေးမြို့တွင် ယာဉ်စည်းကမ်းလမ်းစည်းကမ်းဆိုင်ရာ အသိပညာနှီးနှောဖလှယ်ပွဲများဆောင်ရွက်နေခြင်းများနှင့်အတူ အများပြည်သူများ ယာဉ်အန္တရာယ် ကင်းရှင်းစေ ရေးအတွက် မကွေးတိုင်းဒေသကြီး ယာဉ်စည်းကမ်း ထိန်းသိမ်းရေးကြီးကြပ် မှုကော်မတီ က နေ့စဉ် စည်းကမ်းတကျစီးနင်းစေရေးအတွက် လူအများစည်ကားရာနေရာများတွင် စစ်ဆေးခြင်း၊ ပညာပေးခြင်း လုပ်ငန်းများဆောင်ရွက် လျက်ရှိကြောင်းသိရသည်။