ပွင့်ဖြူမြို့နယ်ရဲတပ်ဖွဲ့မှ မသင်္ကာဆိုင်ကယ်ဖမ်းဆီးရာမှ ခိုးရာပါ ဆိုင်ကယ်(၁၀)စီး ဖော်ထုတ်သိမ်းဆည်း အရေးယူဆောင်ရွက်မှု

မကွေးမြို့၊ ဖေဖော်ဝါရီလ ၁၈ ရက်

၂၀၁၉ ခုနှစ်၊ ဇန်န၀ါရီလ ၃၁ ရက်နေ့ နံနက် ၁၀ နာရီခန့်တွင် ပွင့်ဖြူ မြို့မရဲစခန်းမှ ဒုရဲအုပ် ရဲမွန်နှင့် အဖွဲ့သည် သက်သေများနှင့်အတူ နယ်မြေသတင်းစုံစမ်းနေစဉ် မုန်းချောင်းတံတားထိပ်အရောက်တွင် ရှောက်တောကျေးရွာဘက်မှ ပွင့်ဖြူမြို့ဘက်သို့ ပွင့်ဖြူမြို့နယ်၊ စည်ပင်သာယာကျေးရွာနေ မျိုးနိုင်ဝင်း(ခ) မင်းမင်း(ခ)ကပ္ပလီ၊ ၁၈ နှစ်၊ (ဖ)ဦးမြတ်မောင်၊ မောင်းနှင်လာသော ၄၁ယ/၉၈၃၂၁ Dayang 125 အနီရောင် ဆိုင်ကယ်အား ရပ်တန့်စစ်ဆေးရာ ၎င်းမောင်းနှင်လာသည့် ဆိုင်ကယ်အား ပိုင်ဆိုင်ကြောင်းအထောက် အထား တစ်စုံတစ်ရာပြောဆိုပြသနိုင်ခြင်းမရှိသည့်အပြင် တစ်နေရာရာမှ ခိုးယူ လာသည်ဟု မသင်္ကာဖွယ် စစ်ဆေးတွေ့ရှိရ၍ မျိုးနိုင်ဝင်း(ခ) မင်းမင်း (ခ)ကပ္ပလီအား ပွင့်ဖြူမြို့မ ရဲစခန်း(ပ)၅၈/၂၀၁၉၊ ရာဇသတ်ကြီး ပုဒ်မ ၃၇၉/ကျင့် ၅၄ အရ အရေးယူဆောင်ရွက်ခဲ့ပါသည်။

ဖေဖော်ဝါရီလ ၁ ရက်နေ့တွင် ဒုရဲအုပ် ရဲမွှန် နှင့်အဖွဲ့သည် အမှုမှ ကွင်းဆက်တရားခံ မျိုးနိုင်လင်းနှင့် မင်းဌေးဦးတို့အား လိုက်လံစုံစမ်းနေစဉ် ညနေ ၅ နာရီခွဲခန့်၌ မုန်တောကြီးကျေးရွာအရှေ့ဘက်တွင် မသင်္ကာဖွယ်လူတစ်ဦး တွေ့ရှိရသဖြင့် စစ်ဆေးရာ မင်းဌေးဦးနှင့် ညီအစ်ကိုအရင်းတော်စပ်သူ ဘိုဆန်းဦး၊ ၃၃ နှစ်၊ (ဖ)ဦးသန်းအေး ဆိုသူဖြစ်ပြီး ၎င်းထံမှ MI အဖြူရောင်ဖုန်း(၁)လုံးအား တွေ့ရှိသိမ်းဆည်းရမိသဖြင့် စစ်ဆေးရာ ဖုန်းအား ပိုင်ဆိုင်ကြောင်း အထောက်အထားတစ်စုံတစ်ရာ ပြသ နိုင်ခြင်းမရှိဘဲ တစ်နေရာရာမှ ခိုးယူလာသည်ဟု မသင်္ကာဖွယ်တွေ့ရှိရသဖြင့် ဘိုဆန်းဦးအား ပွင့်ဖြူမြို့မရဲစခန်း (ပ)၅၉/၂၀၁၉၊ ရာဇသတ်ကြီးပုဒ်မ ၃၇၉/ကျင့် ၅၄ အရ အရေးယူဆောင်ရွက်ခဲ့ပါသည်။

အမှုမှ ကွင်းဆက်တရားခံ မျိုးနိုင်လင်းနှင့် မင်းဌေးဦးတို့အား ဖေဖော်ဝါရီလ ၂ ရက်နေ့ နံနက် ၁၀ နာရီခွဲ ခန့်တွင် လည်းကောင်း၊ ခိုးရာပါပစ္စည်းများ လက်ခံပေးသူ ကုလား(ခ)မြသိန်း၊ ၅၂ နှစ်အား ဖေဖော်ဝါရီလ ၃ ရက်နေ့ နေ့လည် ၂ နာရီခွဲခန့်တွင် စကုမြို့အထွက် လမ်းဘေး၌လည်းကောင်း ဖမ်းဆီးနိုင်ခဲ့ပြီး စုစုပေါင်း တရားခံ(၅)ဦး တို့၏ ထွက်ဆိုချက်များအရ ပွင့်ဖြူမြို့နယ်၊ မင်းဘူး(စကု)မြို့နယ် နှင့် စလင်းမြို့နယ်များမှ ခိုးယူခဲ့သော စုစုပေါင်းဆိုင်ကယ်(၁၀)စီးအား ဖော်ထုတ်သိမ်းဆည်းနိုင်ခဲ့ပြီး အမှုဖွင့် အရေးယူဆောင်ရွက် လျက်ရှိကြောင်း သတင်းရရှိပါသည်။